Ĕmbe Lalaki Jeung Sapi Lalaki

Aya ĕmbe badot hiji leuwih bĕdas, sasamana ĕmbe atawa dulurna kabeh taya nu kaduga nyangga karosaännana, nu matak jadi ĕdir, rasana geus teu boga lawan, nĕpi ka bisa nangtang pĕrang tandingan ka sapi lalaki. Parĕng papanggih tuluy anggang-anggangan, sĕja rek neunggar; gĕprak sapisan neunggarna, ĕmbe rubuh satĕngah paeh, tandukna rĕmuk; sapi lalaki nu meunang pĕrangna, tuluy bae leumpang.

Barĕng ĕmbe lalaki geus ingĕt tina kalĕngĕrna, sobatna hiji ngaliwat di dinya, nenjo manehna ngajoprak dina taneuh, tuluy ditanya: Keur naon euy ngajoprak di dinya? Wangsulna: kami hayang nyaho di awak sorangan nyoba-nyoba kabĕdasan.

Hartina iyeu dongeng: kalakuan ĕmbe lalaki eta ngabuktikeun omong paribasa, jĕlĕma kumaki palatat-polotot samemeh tiwas, ari geus tiwas ngalehleh.

__________