Beurit Jeung Landak

Keur usum tiris aya landak jeung beurit-cantung. Landak boga pamenta ka beurit-cantung, hayang mondok dina liyangna, supaya bisa nyingkahan tiris.

Beurit gancang bae nitah asup kana liyangna, tapi landak barĕng geus asup kana ĕnggon beurit, cicing bae teu bijil-bijil, tuluy ngeunah-ngeunah bae, dĕpa dina liyang beurit. Nu boga liyang teh, ngenca-ngatuhu, kukurilingan teu bisa asup, tina heurin kaburang ku suji rangsĕb, geus teu meunang cicing, kacocog ku bulu semahna.

Dina mangsa harita beurit-cantung kacida kaduhungna, rumasa meunang salah, datang ka bijil omongna ka landak: Ayeuna kula geus teu bĕtah nyorangan di luwar, ari asup ka jĕro heurin, teu asup diĕnggonan ku duwaan, ayeuna sakadang landak geura undur, ulah aya di liyang kula. Landak ngawangsul bari seuri: Saha nu teu ngeunah dina liyang yeu, hade maneh bijil, kami mowal datang ka nyingkah, ĕmbung undur tina liyang iyeu, tina manggih kasĕnangan.

Hartina iyeu dongeng: lamun maneh rek ngawawuhan jĕlĕma, kudu dipikir heula beyakkeun, sok reya jĕlĕma manggih kasusahan, jalan tina kurang pamikir, gancang nyobat.

__________