Manuk Cakakak

Aya manuk cakakak, isuk-isuk euteup dina dahan kai sisi situ keur ngintip lauk, manggih tampele arěy-arěyan. Cakakak ngomong: Hih tampele pait! Leungit tampele, beh beunteur, cakakak ngomong deui: Hih beunteur rungsėb! Bol deui corengcang, cakakak ngomong deui: Corengcang lauk reya cucuk, leuwih hade lauk emas atawa kancra, wěleh hanteu tembong, beuki beurang ngintipna; tina ĕngeus beurang lauk laleutik oge hanteu aya, cakakak susah atina, lauk leutik hanteu diala, lauk gěde hanteu aya. Geus kitu aya kancra něnggak di tengah, cakakak ngomong: Lamun di sisi siya disamběr ku aing! Tapi lauk kancra hanteu daekeun nyisi. Cakakak bati susah bae, tuluy hiběr lengoh, di sawah manggih bangkong, disamběr beunang, cakakak suka ati, karana bangkong teh hanteu gagal.

Hartina iyeu dongeng: sagala kalakuan ulah kaleuwihan, lamun aya pirějěkieun atawa kauntungan nu enggeus tembong, ulah diliwat, tina sok hese deui kapanggihna. Moro julang ngaleupaskeun peusing.