Manuk Gagak

Kiai Jarwa boga hiji anak lalaki, ngaranna ki Sidin, keur umur sapuluh taun, ari ingon -ingonna gagak. Bawaning geus kacida lindeukna, diabur bae, najan hiběr jauh ge teu tuluy minggat. Ki Sidin bungah kacida, sabab eta gagak bawaning lindeuk bisa niru-niru jělěma, ngomong sakěcap duwa kěcap, tatapi ki Sidin cuwa saeutik ka gagak teh, krana ari nenjo duit tuluy bae dipacok diruwang dina taneuh. Ari gagak keur kitu polahna, ki Sidin sěmuna murang-mareng garetek kana gagak, sarta tuluy nanya ka bapana: Bapa naon sababna eta gagak sok nyokotan duwit, krana rasa kawula, ari no kesěbut manuk mah duwit eta taya pigaweeunnana, moal cara jělěma?

Wangsul bapana: Běněr Sidin omong maneh kitu, mungguhing manuk gagak duwit eta taya pigaweunnana, tatapi aya oge jalma cěrědik murka, nya cara kitu pamolahna, rěsěp ngampihkeun duwit bae, sarta suhud ngumpulkeunnana, manehna oge ari rek make nyaaheun, sumawonna mere, nulung ka nu miskin, hanteu pisan, ngan rěsěp ngampihan bae; eta nu kitu beunang disěbut burung, sabab hayang jadi juru simpěn bae, lain hayang boga, keur nulung atawa keur pakeeun sorangan.